Pwll padlo Craig y Don - diweddariad 21/06/24
Mae contractwyr wrthi’n gweithio ar gamau olaf y gwaith ar bwll padlo Craig y Don - mae angen gwneud y gwaith hwn yn ystod cyfnod estynedig o dywydd sych.
Mae’r tywydd wedi gwella ers diwrnod neu ddau ac rydym yn gobeithio y bydd yr amodau cliriach, mwy sefydlog hyn yn golygu y gellir cwblhau rhannau olaf pwll padlo Craig y Don.
Mae’r tîm a’r contractwyr yn ymwybodol bod angen cwblhau cyn gynted â phosibl, fel y gall preswylwyr ac ymwelwyr fwynhau’r cyfleuster hwn sy’n annwyl i bawb.
Mwy o wybodaeth:
Ym mis Ebrill 2023, cadarnhawyd na fyddai pyllau padlo Conwy yn agor oherwydd methiant y profion llithro. Cytunwyd tra bod y pyllau ar gau, y gellid gwneud mwy o waith strwythurol cyn gosod y gorchudd arbenigol newydd.
Yn dilyn eu hailwampio, ail agorodd y pyllau padlo yn Llanfairfechan, Penmaenmawr a Llandrillo-yn-Rhos ym mis Mai 2024.
Y pedwerydd pwll padlo yng Nghraig y Don yw’r mwyaf o bell ffordd. Mae'r holl waith adeiladu mawr wedi'i gwblhau ac mae contractwyr wedi bod yn gwneud camau olaf eu gwaith pan fydd y tywydd yn caniatáu. Bydd dyddiad agor pwll padlo Craig y Don yn cael ei gadarnhau cyn gynted ag y bydd yn barod.
Wedi ei bostio ar 21/06/2024