Safon Amgylcheddol y Ddraig Werdd

Safon Amgylcheddol y Ddraig Werdd

Mae Cyngor Bwrdeistref Sirol Conwy wedi cadw ardystiad Lefel 5 Safon Amgylcheddol y Ddraig Werdd am y ddegfed flwyddyn yn olynol. 

Mae Safon Amgylcheddol y Ddraig Werdd yn unigryw i Gymru ac wedi’i dylunio i hyrwyddo rheolaeth amgylcheddol dda ac i helpu sefydliadau reoli eu gweithgareddau er mwyn cael effaith gadarnhaol ar yr amgylchedd. 

Mae cadw’r achrediad yn dangos fod Cyngor Bwrdeistref Sirol Conwy wedi cael cydnabyddiaeth genedlaethol am ei ymrwymiad i reolaeth amgylcheddol dda, am hyrwyddo gwelliant amgylcheddol ac am gymryd ei gyfrifoldeb am yr amgylchedd o ddifrif.

Yn ystod yr asesiad, canmolwyd y Cyngor am nifer o enghreifftiau o arferion da, megis ei ymrwymiad i ddal ati i wella ei reolaeth amgylcheddol ac am lefel yr ymwybyddiaeth ymysg staff o sut y mae eu gweithgareddau’n effeithio’r amgylchedd ar draws y sefydliad, o’r uwch reolwyr i’r staff rheng flaen. 

Meddai Rhun ap Gareth, Prif Weithredwr Cyngor Bwrdeistref Sirol Conwy, “Ychydig iawn o sefydliadau o faint a chymhlethdod Conwy sydd wedi llwyddo i gael achrediad Lefel 5 ar draws eu busnes cyfan, ac rydym yn falch o fod wedi cyflawni’r gamp hon. 

“Mae’r safon yn dangos ein hymrwymiad i welliant amgylcheddol parhaus ac i’n hamcan o fod yn sero net erbyn 2030 fel rhan annatod o’n cynllun corfforaethol ar gyfer 2022–2027.”

“Mae’r safon yn cynnig llawer o fuddion i’n sefydliad, gan gynnwys gwell effeithlonrwydd ynni, lleihad yn ôl troed carbon y Cyngor a gwell cynaliadwyedd amgylcheddol.”

Meddai’r Cynghorydd Geoff Stewart, Aelod Cabinet yr Amgylchedd, Ffyrdd a Chyfleusterau, “Drwy ennill yr achrediad hwn, rydym wedi cyflawni un o gamau blaenoriaeth Cynllun Corfforaethol Conwy. 

“Mae’n gyflawniad rhagorol ac yn gadael i ni arwain y ffordd drwy wreiddio arferion amgylcheddol da yn ein bywydau bob dydd, ac wrth wneud hynny, rydym yn diogelu amgylchedd naturiol Conwy nawr ac ar gyfer cenedlaethau’r dyfodol.”