Rydym yn gyfrifol am ddarparu gwasanaethau i’r bobl sy’n byw, yn gweithio ac yn ymweld â Chonwy, ac rydym wedi ymrwymo i gynnig cyfle cyfartal i bawb. Mae hynny’n cynnwys ein staff.
Ein Staff
Gall gweithwyr a darpar weithwyr ddisgwyl i ni:
- Greu diwylliant sy’n cydnabod a gwerthfawrogi ein staff
- Hyrwyddo amgylchedd gwaith sy’n rhoi hawl i urddas a pharch i’n holl weithwyr
- Adolygu ein ffordd o wneud pethau’n rheolaidd i sicrhau eu bod yn adlewyrchu deddfwriaeth, codau ymarfer cyhoeddedig ac arferion gorau
Rydym yn Gyflogwr Hyderus o ran Anabledd. Wrth sicrhau cyfleoedd cyfartal, rydym yn croesawu pawb, ac yn mynd ati i annog staff i herio ein ffordd o edrych ar gydraddoldeb. Rydym yn mynd i’r afael â materion cydraddoldeb ac yn hyrwyddo ymwybyddiaeth drwy gefnogi ein Cefnogwyr Cydraddoldeb, sef aelodau staff a enwebir o bob maes gwasanaeth.
Rydym yn adolygu gwybodaeth am ein gweithlu bob blwyddyn fel rhan o’n hadroddiad monitro cyflogaeth. Byddwn yn defnyddio’r wybodaeth hon i glustnodi problemau a chynllunio sut i fynd i’r afael â nhw.
Ein Diwylliant
Ein hegwyddorion arweiniol:
- Dathlu amrywiaeth a gwahaniaethau
- Cynhwysiant a hygyrchedd
- Cael gwared â gwahaniaethu ac anfantais
- Atebolrwydd
Mae ein Cynllun Cydraddoldeb Strategol yn cefnogi Deddf Llesiant Cenedlaethau'r Dyfodol (Cymru), i greu Cymru fwy cyfartal, yn ogystal â chefnogi ymrwymiadau ein Cynllun Corfforaethol. Nod ein hamcanion cydraddoldeb yw hyrwyddo cydraddoldeb ac atal gwahaniaethu, ac rydym yn gweithio gyda phartneriaid ledled gogledd Cymru i gyflawni hyn. Mae gan bob gwasanaeth gamau gweithredu o fewn y cynllun.
Ein Cymuned
Ein nod yw canolbwyntio ar unigolion wrth ddarparu ein gwasanaethau, gan gynnig gwasanaethau a chyfleusterau priodol, hygyrch ac effeithiol i fodloni anghenion ein cymuned.
Rydym yn cydnabod manteision trafodaethau wrth wneud penderfyniadau a chynllunio gwasanaethau. Rydym hefyd yn deall pwysigrwydd cynnwys pawb, gan gynnwys grwpiau a warchodir, fel rhan o’n prosesau, ac fe wnaethom hyn wrth ddatblygu ein Cynllun Cydraddoldeb.