Pam Ymweld?
- Addas ar gyfer Cadeiriau Olwyn
- Cyfleusterau ar y safle
- Bywyd gwyllt unigryw
Mae Twyni Cinmel yn un o’n Gwarchodfeydd Natur Lleol (GNL). Roedd unwaith yn rhan o system dwyni tywod arfordirol llawer mwy, ond bellach mae’n ffurfio rhimyn cul rhwng Towyn a’r Rhyl. Mae’r twyni’n gynefin gwerthfawr i nifer fawr iawn o blanhigion ac anifeiliaid.
Yr amser gorau i weld blodau a bywyd gwyllt yma yw rhwng mis Mai a mis Awst.
Mae’r twyni hefyd yn cysgodi traeth tywodlyd helaeth o fewn Bae Cinmel – sy’n golygu y gallwch chwilio am gregyn neu adeiladu castell tywod ar ôl bod ar eich taith natur drwy’r twyni.
Mae Llwybr y Twyni yn daith gylchol 1 milltir o hyd sy’n eich galluogi i archwilio’r holl safle’n ddiogel a heb ymyrryd â’r bywyd gwyllt. Mae Llwybr y Twyni hefyd yn cynnwys rhan fach o Lwybr Arfordir Gogledd Cymru.
Pa fywyd gwyllt fyddwch chi’n ei ddarganfod?
Boed yn isel ymysg y tywod neu ymhellach yn ôl ymysg y gwair hir, dyma ychydig o flodau sy’n ychwanegu ychydig o liw at y twyni, i chi edrych amdanynt:
- Crafanc brân y gweunydd
- Moronen y Meysydd
- Melynydd
- Meillion cedenog
- Maglys
Yn hedfan ymysg y blodau rhwng Ebrill a Mai, gallwch weld y gloÿnnod byw hyn a mwy:
- Iâr Wen Fach
- Iâr wen wythiennog
- Gwyn blaen oren
- Gwerloyn y ddôl
Os eisteddwch yn dawel ar dywod noeth sy’n wynebu’r de o amgylch hanner dydd, mae’n bosib y gwelwch chi fadfall.
Mae’r cudyll coch preswyl i’w weld yn aml ar ben dwyreiniol y twyni, yn hela am lygoden y gwair neu chwistlen.
Efallai y byddwch yn ddigon lwcus i glywed cân yr ehedydd. Mae’n ddiamddiffyn rhwng Mai ac Awst gan ei fod yn nythu ar y ddaear, ac mae’n hawdd iawn i gŵn a phobl ddinistrio’r nyth yn anfwriadol. Mae niferoedd yr ehedydd yn gostwng yn ddramatig oherwydd eu bod yn colli eu cynefinoedd – mae bod yn Warchodfa Natur Leol ddynodedig yn diogelu’r twyni rhag datblygiad.
Os cânt eu chwythu trwodd yn ystod tywydd gwael gallech weld ymwelwyr prin fel Bras y Gogledd neu fras yr eira wrth iddynt fudo.
O eistedd ar un o’r meinciau sydd ar yr olygfan, yn uchel yn y twyni, byddwch mewn safle da i weld llamhyddion allan yn y môr.
Mae mwy o wybodaeth ar y rhestr rhywogaethau ar wefan Aderyn neu wefan Ymddiriedolaeth Natur Gogledd Cymru
Sut i gyrraedd yno
Cerdded a Beicio
Mae’n cymryd 20 – 30 munudi gerdded o Dowyn neu’r Rhyl ac mae arwyddion i’ch arwain o’r briffordd. Gellir cyrraedd y safle hefyd drwy ddilyn Llwybr 5 y Rhwydwaith Beicio Cenedlaethol
Cludiant Cyhoeddus
Gorsaf fysiau Bae Cinmel yw’rsafle bws agosaf, 5 munud yn unig o gerdded oddi wrth y safle, gyda digon o fysiau lleol yn rhedeg yn rheolaidd.Yr orsaf drenau agosaf yw Abergele a Phensarn.
Gyrru
O’r gorllewin cymrwch yr A55 at gyffordd 23A. O’r dwyrain gadewch i gyfeiriad yr A525.
Cyfleusterau
- Paneli Dehongli gyda mapiau o’r safle a gwybodaeth am fywyd gwyllt lleol.
- Ciosg lluniaeth gyda thoiledau (ar agor yn ystod misoedd yr haf)
- Llefydd eistedd ar hyd y promenâd ac yn yr olygfan
- Taith gerdded 5 munud i siop ASDA Y Rhyl gyda chaffi a thoiledau sydd ar agor drwy’r flwyddyn
- Parcio talu ac arddangos ar ben draw St Asaph Avenue
- Taith gerdded sy’n addas ar gyfer cadeiriau olwyn ar hyd y promenâd
Croesawir cŵn ar dennyn ar y safle. I’r gorllewin o’r Warchodfa mae Ardal Dim Cŵn. Defnyddiwch y biniau a ddarperir ar gyfer baw cŵn.
Darganfod mwy am gynefin a bywyd gwyllt y twyni
Beth sydd gerllaw?
Os ydych yn dilyn Llwybr Arfodir Cymru, gallwch hefyd ymweld â Phensarn SSSI, 3 milltir yn unig i’r gorllewin o dwyni Cinmel.
Mae gwefan Dewch i Gonwy yn rhoi gwybodaeth am lety a chyfleusterau lleol.