Ynglŷn â’r ymgynghoriad
Cynhaliwyd ymgynghoriad teithio llesol Marl Lane rhwng 21 Mehefin ac 13 Gorffennaf 2023.
Roedd deunyddiau ymgynghori ar gael ar wefan y Cyngor, ar ffurf pecyn papur drwy’r post, drwy apwyntiad yn swyddfeydd Coed Pella, yn ogystal ag opsiynau hygyrch ychwanegol gan gynnwys dehongliad Iaith Arwyddion Prydain.
Hyrwyddwyd yr ymgynghoriad ar y cyfryngau cymdeithasol, mewn datganiadau i’r wasg, ar wefan y Cyngor ac mewn llythyrau at fudd-ddeiliaid lleol.
Roedd deunyddiau’r ymgynghoriad yn egluro’r materion y gobeithiwyd y byddai’r cynllun yn mynd i’r afael â hwy. Roedd hyn yn cynnwys diffyg cysylltiadau priodol i gerddwyr a beicwyr rhwng Deganwy a Chyffordd Llandudno a’r anawsterau o ran cysylltiad i gymunedau Bryn Pyrdew ac Esgyryn gyda chyfleusterau mewn trefi a phentrefi cyfagos yn sgil yr A470 a’r diffyg mannau croesi diogel.
Roedd yr ymgynghoriad hwn yn cynnig cyfle i gymunedau a defnyddwyr ffyrdd eraill ystyried y cynigion a darparu adborth ar y cynllun a sut i’w wella.
Ymatebion i’r ymgynghoriad
- Ymatebodd 43 o bobl i’r ymgynghoriad
- Dywedodd 35 o bobl eu bod yn bennaf o blaid y cynigion
- Dywedodd 8 o bobl eu bod yn bennaf yn erbyn y cynigion
Roedd cryn dipyn o’r adborth wedi crybwyll materion mewn perthynas â chroesi’r A470:
“Mae’n hen bryd i’r broblem hon gael ei datrys. Mae croesi’r A470 yn beryglus sy’n golygu bod yn rhaid i ni ddefnyddio ein ceir heb fod angen ar adegau prysur. Bydd hyn yn gwneud gwahaniaeth cadarnhaol enfawr i bawb ym Mryn Pydew a Chyffordd Llandudno.”
“Bydd cynnwys systemau rheoli traffig, megis goleuadau traffig, yn ei gwneud hi’n llawer haws i groesi’r A470 a chael mynediad at ardaloedd megis Coed Marl. Bydd hefyd yn ei gwneud yn haws i rieni gerdded eu plant i ac o’r ysgol i ystadau cyfagos, gan leihau’r traffig ar ac o amgylch yr A470."
“Rwy’n croesi’r A470 i fynd i Goed Marl yn rheolaidd. Byddai hyn yn ei wneud yn llawer mwy diogel.”
“Am fendigedig! Rwy’n gyrru dros yr A470 i fynd â’r ci am dro i Goed Marl ar hyn o bryd gan nad wyf yn teimlo’n ddiogel yn croesi ar droed. Byddai’r cynlluniau hyn yn fy ngalluogi i adael y car gartref.”
“Rwyf o blaid gosod mannau croesi ar yr A470. Rydym yn byw yn ystâd Gwel y Mynydd ac yn gyrru’r car dros y brif ffordd yn rheolaidd i fynd i Goed Marl gan nad oes man diogel i groesi. Byddai mannau croesi’n fuddiol iawn.”
“Rwy’n croesawu unrhyw gynlluniau i wneud yr ardal yn fwy hygyrch i gerddwyr. Rwyf wrth fy modd yn cerdded yng Nghoed Marl. Rwy’n byw’n agos iawn i Goed Marl, ond mae’n rhaid i mi ddefnyddio’r car i gyrraedd yno ar hyn o bryd gan nad ydw i’n teimlo’n ddiogel yn croesi’r ffordd, yn arbennig gyda’m plentyn ifanc.”
“Rwy’n hoff iawn o’r cynllun hwn. Credaf y bydd yn dda i’r amgylchedd. Rwyf hefyd yn cymeradwyo’r agwedd gyfeillgar i blant a cherddwyr hefyd. Bydd y cynllun yn dda iawn i’r gymuned leol.”
“Rwy’n defnyddio’r llwybr hwn bob dydd i fynd â’r ci am dro ac fe ddylai cynghorau ymgysylltu â gwelliannau lleol sy’n annog pobl i fynd allan a cherdded neu feicio i hyrwyddo iechyd a lles y gymuned. Rwy’n bendant o blaid y cynigion hyn er mwyn diogelu a chefnogi lles y gymuned leol. Diolch.”
Roedd rhai ymatebwyr yn bryderus am effaith y goleuadau traffig a fyddai’n rheoli’r mannau croesi i gerddwyr:
“Fel rhywun sy’n cerdded ac yn gyrru ar y ffordd hon yn ddyddiol, credaf y gallai goleuadau traffig achosi problemau. Rwy’n teimlo y gallai ychwanegu goleuadau traffig achosi damweiniau sylweddol oni bai bod y terfyn cyflymder yn cael ei newid.”
“Mae’r A470 yn un o’r prif lwybrau i mewn ac allan o Landudno, mae’r traffig yn sgil y gwaith ffordd presennol yng Nghyffordd Llandudno a’r defnydd o’r ffordd hon fel llwybr amgen yn hurt. Byddai unrhyw gynllun sy’n culhau’r ffordd, yn cyfyngu’r cyflymder 60mya neu’n gosod mannau croesi i gerddwyr ar brif lwybr mor allweddol yn syniad gwael gan y byddai hyn yn achosi llawer mwy o broblemau yn hytrach na’u datrys.”
Roedd un preswylydd o’r farn fod y cynllun yn canolbwyntio ar anghenion gyrwyr yn hytrach na beicwyr a cherddwyr:
“Cynlluniau traffig yn seiliedig ar geir unwaith eto, er gwaetha’r modd. Rydych yn gwneud popeth o fewn eich gallu i ddargyfeirio beicwyr a cherddwyr er mwyn osgoi unrhyw effaith ar lif traffig yr A470. Rydym yn haeddu gwell yn 2023.”
Casgliad
Rydym ni wedi ystyried bob un sylw a dderbyniwyd yn ystod yr ymgynghoriad. Nid yw’r cynllun wedi newid yn sylweddol ers yr hyn a gyflwynwyd yn yr ymgynghoriad, credwn fod y cynigion yn darparu’r cydbwysedd cyffredinol gorau i holl ddefnyddwyr y ffyrdd a’r llwybrau teithio llesol.