Cyngor yn Cymeradwyo Cynllun Corfforaethol wedi'i Ddiweddaru

Cyngor yn Cymeradwyo Cynllun Corfforaethol wedi'i Ddiweddaru

Ers sawl blwyddyn, mae Cyngor Bwrdeistref Sirol Conwy wedi cynnal adolygiad blynyddol i ddiweddaru’r Cynllun Corfforaethol. Cafodd y Cynllun Corfforaethol diwygiedig ei gymeradwyo gan Gynghorwyr yng nghyfarfod y Cyngor ddoe (27/02/25). 

Mae’r Cynllun Corfforaethol, sydd ar waith tan 2027, wedi cael ei ddiwygio i fynd i’r afael â heriau’r hinsawdd ariannol bresennol, a’i ddiwygio o naw canlyniad i bump nod allweddol.  Nod y diwygiadau yw cynyddu gallu’r Awdurdod i gyflawni ei uchelgeisiau hirdymor yn fwy effeithiol ac effeithlon.

Mae’r pum nod allweddol yn canolbwyntio ar y meysydd pwysicaf sydd yn creu newid cadarnhaol a datblygiad cynaliadwy yn y gymuned.

Meddai Arweinydd y Cyngor, y Cynghorydd Charlie McCoubrey: “Mae hi’n bwysig iawn ein bod ni’n canolbwyntio ein hymdrechion a’n hadnoddau yn ystod y cyfnod economaidd heriol yma.  Mae’r pum nod allweddol yn rhoi rhagor o eglurder er mwyn sicrhau bod ein gweithredoedd yn cael effaith sydd yn cyd-fynd ag anghenion ein cymunedau.”

Y pum nod hirdymor sydd wedi’u hamlinellu yn y Cynllun Corfforaethol ydi:

1. Cyngor Gwydn - Bydd y Cyngor yn gynaliadwy ac yn parhau i allu darparu gwasanaethau craidd i fodloni anghenion trigolion ac ymwelwyr.

2. Yr Amgylchedd - Bydd ein gweithredoedd yn arafu’r newid yn yr hinsawdd ac yn diogelu’r amgylchedd ar gyfer cenedlaethau'r dyfodol.

3. Ffyniant a Dysg - Bydd ein treftadaeth gyfoethog wedi’i diogelu er mwyn cefnogi lles cenedlaethau’r dyfodol. Byddwn wedi llwyddo i gadw talentau sy’n cefnogi twf ac yn rhoi Conwy wrth wraidd economi Gogledd Cymru. Bydd ein plant yn ddysgwyr uchelgeisiol a medrus. Byddant yn unigolion iach a hyderus sy’n chwarae rhan weithgar yn ein cymunedau, gyda’r sgiliau sydd eu hangen ar gyfer y cyfleoedd swyddi sydd ar gael.

4. Tai - Drwy ganolbwyntio ar ddull strategol, byddwn wedi creu cymunedau cynaliadwy y mae’r trigolion yn falch o’u galw’n gartref. 

5. Lles - Rydym eisiau creu amgylchedd lle mae diogelu’n gyfrifoldeb i bawb a lle nad oes unrhyw un yn cael eu niweidio.  Byddwn yn galluogi pobl i fyw bywydau hirach, iachach a hapusach.  Rydym eisiau i bobl allu gofalu amdanynt eu hunain, gwneud dewisiadau bywyd iach a byw’n dda gyda phroblemau iechyd cronig. Byddwn wedi lleihau effeithiau niweidiol tlodi. Drwy gefnogi’r sector gofal, bydd y gofal cywir ar gael pan fo’i angen, a bydd yn bodloni anghenion poblogaeth demograffig newidiol Conwy.

Meddai’r Cynghorydd McCoubrey “Rydym ni wedi ymrwymo i weithio gyda chymunedau, busnesau a phartneriaid i gyflawni’r golau yma, a bydd y Cynllun Corfforaethol diwygiedig yma’n gweithredu fel map trywydd ar gyfer mentrau a gweithredoedd yr awdurdod ar gyfer y weinyddiaeth bresennol.”

Mae rhagor o wybodaeth am y Cynllun Corfforol diwygiedig ar gael ar wefan Conwy: www.conwy.gov.uk/cynlluncorfforaethol