Golau gwyrdd ar gyfer gwaredu Bodlondeb

Golau gwyrdd ar gyfer gwaredu Bodlondeb

Mae Cyngor Bwrdeistref Sirol Conwy wedi dewis cynigydd a ffafrir ar gyfer adeilad swyddfa Bodlondeb yng Nghonwy. 

Mae aelodau’r Pwyllgor Craffu Cyllid ac Adnoddau a’r Cabinet wedi cefnogi dyfarnu’r brydles i Ideas Forums Ltd o Gaerdydd a fydd yn adnewyddu’r swyddfeydd fel Canolfan Busnes ac Arloesi. 

Meddai’r Cynghorydd Charlie McCoubrey, Arweinydd y Cyngor: “Rwy’n falch iawn o gadarnhau bod cwmni Ideas Forums wedi cael ei ddewis i gymryd y brydles ar gyfer Bodlondeb. Roeddem yn cytuno fod y cynnig a gyflwynwyd gan Ideas Forums yn cynnig dyfodol cynaliadwy a chyffrous i’r adeilad, ac yn darparu cyfleoedd datblygu economaidd i dref Conwy a’r ardal ehangach. Hoffwn ddiolch i’m cyd gynghorwyr am eu hystyriaeth ofalus i’r cynnig hwn.”  

Bydd y Cyngor nawr yn dechrau'r broses o ddyfarnu'r brydles, yn amodol ar y prosesau cyfreithiol angenrheidiol.  

Cefndir y Cynigydd a Ffafrir: 

Mae Ideas Forums yn dathlu ac yn cefnogi entrepreneuriaid trwy raglenni fel Gwobrau Mawreddog Entrepreneuriaid Prydain, Mynegai Fast Growth 50 y DU, Gwobrau Busnesau Newydd y DU a’r Ŵyl Syniadau. 

Mae cyfarwyddwyr y cwmni - Francesca James, yr Athro Dylan Jones-Evans a Nick Pritchard – yn falch iawn o gael y cyfle i drawsnewid Bodlondeb yn ganolfan fusnes o safon fyd-eang, gan roi bywyd newydd i adeilad hanesyddol a’i drawsnewid yn ganolfan ddeinamig i entrepreneuriaeth er mwyn llywio twf economaidd lleol a rhanbarthol. 

Dywedodd yr Athro Jones-Evans, “Rwy'n falch iawn o allu dod yn ôl i Ogledd Cymru i wneud Bodlondeb yn ffynhonnell o fentergarwch ac arloesedd yng nghanol Conwy ac yn lleoliad ar gyfer syniadau arloesol a mentrau trawsnewidiol.  Trwy feithrin ecosystem ddeinamig o arloesedd a buddsoddiad mewn lleoliad pensaernïol syfrdanol, ein nod yw llywio datblygiad economaidd, creu swyddi gwerth uchel, a gwneud Conwy’n ganolbwynt byd-eang ar gyfer entrepreneuriaeth â photensial uchel. 

Bydd adeilad hanesyddol ac eiconig Bodlondeb yn cael ei ailwampio i gefnogi datblygiad a thwf cwmnïau entrepreneuraidd sydd â photensial twf uchel gan greu amgylchedd sy’n ffafriol i ddenu mewnfuddsoddiad gan gwmnïau sy’n chwilio am gyfleoedd i gydweithio a thyfu. 

Mae Nick Pritchard, un o entrepreneuriaid mwyaf llwyddiannus Gogledd Cymru yn y degawd diwethaf, yn cefnogi’r fenter i gael mwy o bobl ifanc i sefydlu busnesau newydd yn y rhanbarth. 

Dywedodd “Fel gŵr angerddol o ogledd Cymru sydd eisoes wedi creu llawer o swyddi i weithwyr Cymraeg trwy fy musnesau eraill, hoffwn ddarparu cyfleoedd i bobl ifanc sydd â syniadau gwych i aros a ffynnu yn yr ardal. O ganlyniad, byddwn yn cynnig lle a chymorth am ddim i’r rheiny sy’n dymuno bod yn entrepreneuriaid a chreu busnesau newydd cyffrous a fydd yn tyfu ac yn cael effaith ar eu sectorau. Trwy drawsnewid Bodlondeb yn ganolfan entrepreneuriaeth o safon fyd-eang, ein nod yw creu cannoedd o swyddi newydd a degau o filiynau o bunnau i’r economi leol dros y pum mlynedd nesaf”.

Nodyn: Nid yw’r coetir, y gofeb rhyfel, y lawnt, y maes criced, y cyrtiau tennis na’r maes chwarae i blant wedi’u cynnwys yn y cynnig, a byddant yn parhau i fod ar gael i’r cyhoedd eu defnyddio.