Trwydded Triniaethau Arbennig (Ymarferwyr)

Mae'r cynllun trwyddedu newydd yn ei gwneud yn ofynnol i ymarferwyr sy'n cyflawni unrhyw driniaeth arbennig (aciwbigo, tyllu'r corff, electrolysis a/neu datŵio) ar rywun arall yng Nghymru gael trwydded. Bydd y drwydded yn nodi pa driniaeth(au) arbennig fydd yr ymarferydd wedi'u trwyddedu i ymgymryd â hwy, yn ogystal â rhestru'r safleoedd y bydd yr ymarferydd yn eu defnyddio. Mae’n rhaid i bob ymarferydd gael trwydded eu hunain. Dim ond y safleoedd/cerbydau sydd wedi'u cymeradwyo fydd ymarferwyr trwyddedig yn gallu eu defnyddio.

Mae’n drosedd i ymarferwr ymgymryd ag unrhyw driniaeth arbennig heb drwydded neu ymgymryd ag unrhyw driniaeth o safle neu gerbyd nad yw wedi’i gymeradwyo, oni bai bod gennych drwydded/tystysgrif bontio. Mae hefyd yn drosedd i beidio â chydymffurfio â'r gofynion penodol a nodir yn y rheoliadau ar gyfer ymarferwyr a safleoedd/cerbydau.   

Sut i wneud cais

Sicrhewch eich bod wedi darllen y dudalen hon a thudalennau eraill yn yr adran hon yn llawn cyn i chi wneud cais.

** Dylech ond wneud cais uchod, os ydych yn gweithredu fel ymarferwr o fewn Sir Conwy neu os yw eich safle o fewn Sir Conwy. Os ydych yn gweithio mewn safleoedd lluosog, ar draws ardaloedd Awdurdodau Lleol gwahanol, yna dylech wneud cais i’r Awdurdod Lleol lle rydych yn cynnal y rhan fwyaf o’ch triniaethau arbennig**

Cais gan ymarferwr a gofrestrwyd yn flaenorol

Mae'n ofynnol i ymarferwyr a gofrestrwyd o dan ofynion blaenorol Deddf Llywodraeth Leol (Darpariaethau Amrywiol) 1982 ymgeisio am eu trwydded triniaeth arbennig eu hunain a, lle bo angen, tystysgrif cymeradwyo safle/cerbyd.

Bydd gan y rheiny â chofrestriadau presennol 3 mis o’r dyddiad y daw’r rheoliadau i rym (29 Tachwedd 2024) i gyflwyno cais am drwydded (a, lle bo hynny’n berthnasol, tystysgrif gymeradwyaeth) a byddant hefyd yn elwa o drwydded bontio.  Bydd y drwydded bontio hon yn galluogi ymarferwyr presennol i barhau i ymgymryd â thriniaethau arbennig (yn unol â’u dogfen gofrestru gyfredol), tra bydd y cais am drwydded newydd yn cael ei gyflwyno.

Mae trwyddedau pontio /tystysgrifau cymeradwyo wedi'u dyrannu’n awtomatig i bob safle ac ymarferwyr sydd eisoes wedi cofrestru. Os nad ydych wedi derbyn hwn erbyn hyn, ac roeddech wedi cofrestru gyda Chyngor Conwy yn flaenorol, cysylltwch â ni gan ddefnyddio'r manylion ar waelod y dudalen hon.

Rhaid i chi wneud cais am drwydded o dan y cynllun newydd o fewn y cyfnod hwn o 3 mis (erbyn 28 Chwefror 2025).

Os ydych wedi cyflwyno’ch cais ac nad ydym wedi gwneud penderfyniad ar eich cais erbyn 28 Chwefror 2025, byddwch yn dal i allu parhau i ymarfer ar ôl y dyddiad hwn, hyd nes y byddwn ni (yr awdurdod lleol) yn rhoi penderfyniad i chi ar y cais.

Os na fyddwch yn cyflwyno’ch cais am drwydded a, lle bo’n berthnasol, cais am gymeradwyaeth safle/cerbyd erbyn diwedd y cyfnod pontio, bydd eich trwydded/tystysgrif pontio yn dod i ben ar 1 Mawrth 2025. Ni fydd unrhyw eithriad i’r gofynion i gael trwydded/tystysgrif ac ni ellir ymestyn y cyfnod pontio hwn.

Cais gan ymarferwyr newydd (heb gofrestru o'r blaen)

Ni fydd ymarferwyr newydd nad oeddent wedi’u cofrestru’n flaenorol o dan Ddeddf 1982 cyn y dyddiad daw’r rheoliadau i rym (29 Tachwedd 2024), yn gymwys ar gyfer y trefniadau pontio.

Rhaid i chi gyflwyno ffurflen gais ymarferwr (a lle bo'n berthnasol, ffurflen gais ar gyfer y safle/cerbyd). Unwaith y caiff ei chyflwyno, bydd yn cael ei hasesu a'i phrosesu gan yr Awdurdod Lleol. Ni chaniateir i chi fasnachu/ymarfer nes y byddwch wedi cael trwydded triniaethau arbennig (a, lle bo'n berthnasol, tystysgrif cymeradwyo safle/cerbyd).

Ffioedd

Mae manylion y ffioedd ar gyfer pob trwydded, trwydded dros dro neu amrywiadau eraill wedi’u nodi isod. Ni ystyrir bod cais wedi cael ei gyflwyno nes bydd ffi’r cais wedi cael ei derbyn a’i chlirio.  

Cyfnod y drwydded 

Bydd y Trwyddedau Triniaethau Arbennig yn para 3 blynedd o ddyddiad cyhoeddi’r drwydded.  Bydd y trwyddedau dros dro’n ddilys am hyd at 7 diwrnod. 

Cymhwysedd

Rhaid i ymgeiswyr fod dros 18 oed.

Dogfennau Ategol

Rhaid i geisiadau gynnwys y canlynol:

• Ffi’r cais (i’w thalu fel rhan o’r ffurflen gais ar-lein).
• Llun lliw math pasbort o’ch wyneb cyfan.
• Tystiolaeth o yswiriant dilys ar gyfer ymgymryd â thriniaethau arbennig.
• Tystysgrif cofnod troseddol a gyhoeddwyd gan y Gwasanaethau Datgelu a Gwahardd (dim mwy na 3 mis o'r dyddiad cyhoeddi)
• Datganiad o droseddau perthnasol (fel yr amlinellir yn y Ddeddf).  
• Tystiolaeth o fod wedi cwblhau Gwobr Lefel 2 yn llwyddiannus (atal a rheoli haint).
• Copi o ddogfennau adnabod yn cadarnhau enw llawn a dyddiad geni (e.e. pasbort dilys neu drwydded yrru).

Prosesu ac Amserlenni

Caiff ceisiadau newydd eu prosesu o fewn yr amserlenni a nodwyd gan ganllawiau statudol/anstatudol Llywodraeth Cymru.  

Caiff ymarferwyr sydd eisoes wedi cofrestru, sy’n ymgeisio am Drwydded Triniaethau Arbennig o fewn y cyfnod pontio o 3 mis, eu prosesu o fewn 6 mis o ddiwedd y cyfnod pontio, neu’n gynt (h.y. 9 mis o’r dyddiad y daw’r rheoliadau i rym).

Gallai gymryd nifer o fisoedd i awdurdodau lleol asesu’r holl geisiadau wrth symud i’r cynllun trwyddedu newydd.  

Deddfwriaeth ac amodau

Mae Rheoliadau Trwyddedau Triniaethau Arbennig (Cymru) 2024 yn cynnwys gofynion ac amodau penodol ar gyfer ymarferwyr ac mae ar gael ar wefan ‘legislation.gov.uk’ yma: legislation.gov.uk/cy/wsi/2024/1244/contents/made/welsh.

Y rheoliad trosfwaol sy’n amlinellu’r fframwaith cyfreithiol ar gyfer Triniaethau Arbennig a gofynion cyfreithiol eraill yw Deddf Iechyd y Cyhoedd (Cymru) 2017 (Rhan 4).

Gellir gweld amodau'r drwydded ar gyfer ymarferwyr yma: Amodau Trwyddedu Mandadol Ar Gyfer Trwyddedau Triniaethau Arbennig (Ymarferwyr) - (PDF).

Cysylltwch â ni

Os oes gennych unrhyw ymholiadau am y cynllun trwyddedu triniaethau arbennig, anfonwch e-bost at diogelwchbwyd-iechydadiogelwch@conwy.gov.uk. 

Canllawiau pellach

Disgwylir i Lywodraeth Cymru gyhoeddi canllawiau anstatudol ar gyfer y Cynllun Trwyddedu Triniaethau Arbennig, a fydd yn darparu gwybodaeth fanwl am ofynion y cynllun trwyddedu, sut i wneud cais am drwydded a thystysgrif gymeradwyaeth, sut i gydymffurfio â’r drwydded ac amodau cymeradwyo a’r pwerau gorfodi sydd ar gael i’r awdurdod lleol. Bydd y dolenni i’r dogfennau hyn yn ymddangos yma unwaith y byddant ar gael.

Mae Iechyd Cyhoeddus Cymru (ICC) wedi cyhoeddi’r Canllawiau Atal a Rheoli Heintiau (IPC) ar gyfer Triniaethau Arbennig yng Nghymru, sy’n rhoi gwybodaeth a chanllawiau manylach ar fesurau atal a rheoli heintiau, a sut y gellir eu cymhwyso yn y sector triniaethau arbennig. Mae hwn ar gael yma: Infection Prevention and Control (IPC) Guidance for Special Procedures in Wales