Cynllun Corfforaethol 2022 i 2027: Egwyddorion darparu

Mae’r Gymraeg yn rhan ohonom ac o bopeth a wnawn. Ein hiaith ni yw hi ac mae’n perthyn i bawb ohonom. Mae’n rhan o’n hanes, ein treftadaeth a’n diwylliant. Mewn cyfnod lle rydym i gyd yn wynebu llawer o heriau, fe all dathlu ac annog ein Llais Cymraeg ddod â ni ynghyd. Hoffem i bawb ymuno â ni, waeth faint o Gymraeg sydd gennych chi, o le rydych chi’n dod na lle rydych chi bellach yn byw yn sir Conwy.

Ein gweledigaeth yw Conwy ddwyieithog lle mae pobl yn hyderus ac yn falch o’u llais Cymraeg, lle caiff y Gymraeg ei siarad o fewn y teulu, y gymuned a’r gweithle, lle caiff diwylliant Cymru ei ddathlu a lle mae pobl yn teimlo eu bod yn perthyn.

Ein nod yw gosod esiampl o ran defnyddio’r Gymraeg yn y gweithle ac wrth ddarparu ein gwasanaethau. Mae hyrwyddo’r Gymraeg hefyd yn ymwneud â’r teulu, y gymuned, ysgolion, busnesau, twristiaeth ac yn fwy na dim, mae’n ymwneud â phobl. Rhywbeth sy’n perthyn i bobl yw iaith, a nod y cynllun hwn yw helpu pobl i feithrin dealltwriaeth, ewyllys da a chariad, gobeithio, tuag at y Gymraeg a’i chyfraniad i ddiwylliant, cymdeithas ac economi Conwy.

Gobeithio y gwnewch chi ymuno â ni ar y daith tuag at filiwn o siaradwyr Cymraeg erbyn 2050. Ydych chi’n un o filiwn? Os ydych chi’n siaradwr Cymraeg sy’n gallu sgwrsio yn Gymraeg ym mhob sefyllfa, rydym eich angen chi hefyd, i gefnogi eraill ac i helpu creu’r cyfleoedd lle gall y Gymraeg ffynnu. Yn ogystal â chynyddu’r nifer o bobl sy’n gallu siarad ychydig o Gymraeg, rydym eisiau i fwy o bobl siarad Cymraeg bob dydd. Rydym yn cefnogi hyn drwy gydweithio â phartneriaid a chlybiau lleol fel Menter Iaith Conwy, Urdd Conwy, Ffermwyr Ifanc, Mudiad Meithrin, Cymraeg i Blant, Coleg Llandrillo a Rhieni dros Addysg Gymraeg, ymysg eraill. Yn ogystal â chynllunwyr, addysgwyr a Chynghorwyr, mae’r rhain yn rhan o Fforwm Strategol y Gymraeg sydd wedi helpu llunio’r Strategaeth hon, a byddant yn ei chefnogi wrth symud ymlaen. Mae’r her sydd o’n blaenau yn un gyffrous, a thrwy osod gweledigaeth gadarn, rydym yn hyderus y gallwn gydweithio i hyrwyddo’r Gymraeg yn llwyddiannus yma yng Nghonwy. Amdani!

Ewch draw i dudalen lanio’r Gymraeg ac addysg i gael rhagor o wybodaeth am ein cynlluniau a’n strategaethau ategol, ac i weld pa cymorth sydd ar gael i ddysgu’r iaith.

Hoffem i’r dyfodol newid er gwell, gan greu cymdeithas fwy cynhwysol sy’n mynd ati i hyrwyddo tegwch ac amrywiaeth ac yn mynd i’r afael â gwahaniaethu. Ers ysgrifennu ein Cynllun Corfforaethol 2022 i 2027, rydym wedi cyhoeddi ein Strategaeth Conwy Gynhwysol newydd. Mae’r ddogfen hon yn nodi ein hamcanion cydraddoldeb statudol ac yn cynrychioli ein Cynllun Cydraddoldeb Strategol 2024 i 2028. Mae’n canolbwyntio ar bobl a’u profiad bywyd, a waeth beth fo cefndir unigolyn, dylem oll allu byw, gweithio ac ymweld â’n sir a theimlo ein bod yn cael ein croesawu, ein derbyn a’n bod yn perthyn. Drwy ein strategaeth, ein nod yw gwreiddio diwylliant o ymwybyddiaeth a chyfrifoldeb unigol ymysg staff ein bod ni oll yn rhannu cyfrifoldeb i hyrwyddo tegwch, amrywiaeth a chynhwysiant, waeth beth fo’n cefndir a’n profiad. Rydym eisiau i bob aelod staff ddeall ‘nad oes rhaid iddo fod wedi digwydd i chi, i fod o bwys i chi’. Rydym yn gwneud pob ymdrech i wella cyfiawnder, cynwysoldeb, tryloywder, mynediad a thegwch i bawb o ran darpariaeth gwasanaethau a chyflogaeth, a hynny gan sicrhau ein bod yn rheoli ein cyllidebau a’n hadnoddau yn gyfrifol.

Ni allwn gyflawni hyn ar ein pennau ein hunain a byddwn yn parhau i gydweithio â chymunedau, busnesau (gan gynnwys mentrau cymdeithasol) a sefydliadau eraill i greu newid gwirioneddol ac ystyrlon. Rydym wedi manylu ar y camau gweithredu y byddwn yn eu cymryd dros bedair blynedd y strategaeth. Bydd ein Grŵp Llywio Cydraddoldeb, Amrywiaeth a Chynhwysiant (a gadeirir gan ein Prif Weithredwr) yn helpu datblygu, monitro ac adrodd ar ein cynnydd.

Rydym eisiau sicrhau ein bod yn cydweithio’n dda gyda’n cymunedau ym mhopeth a wnawn, a bod eu lleisiau’n cael eu clywed. Mae’n bwysig i ni bod pobl yn teimlo eu bod yn cael gwybodaeth, yn cael eu cynnwys ac yn cael llais.

Drwy ein Strategaeth Cynnwys y Gymuned, hoffem feithrin rhwydweithiau cymunedol cadarn, sy’n golygu gweithio gyda’n Cynghorau Tref a Chymuned, sy’n galluogi ein trigolion i chwarae rhan weithgar yn yr hyn sy’n digwydd yn eu cymuned, ac sydd wedi’u seilio ar egwyddorion ymddiriedaeth a pharch at amrywiaeth lleol. Byddwn yn gwneud yn siŵr ein bod yn cadw at egwyddorion ymarfer ymgysylltu a chyfathrebu da, gan sicrhau bod yr iaith a ddefnyddiwn yn glir, yn blaen ac yn hawdd i bawb ei deall bob amser.

Ochr yn ochr â’n proses bresennol o adrodd am gwynion a chanmoliaeth, ein nod yw denu mwy o leisiau cymunedol a gwybodaeth feincnodi er mwyn gallu dod i ddeall sut rydym yn perfformio, dathlu gwasanaeth da, a hefyd cydnabod sefyllfaoedd pan nad ydym wedi gwneud pethau’n iawn, er mwyn gallu dysgu a gwella fel sefydliad.

Mae’r ‘sir’ (y bobl a’r lle) ar flaen ein meddyliau ym mhopeth a wnawn. Ein bwriad o hyd yw gwella’n barhaus, bod yn ddyfeisgar ac ymchwilio i ddulliau newydd â meddwl agored. Rydym yn gwerthfawrogi ein diwylliant, ein treftadaeth a’n hamgylchedd. Rydym yn benderfynol o fod yn Awdurdod dwyieithog sy’n parchu ac yn hyrwyddo’r Gymraeg ac rydym wedi ymrwymo i fod yn sefydliad di-garbon net erbyn 2030.

Mae ein gwerthoedd wrth wraidd pwy ydym ni, ac yn cynrychioli credoau ein sefydliad. Maent yn llywio’r ffordd rydym yn gweithio, yn ymddwyn ac yn darparu gwasanaethau.

Dyma ein gwerthoedd:

• 1. Rydym yn ymfalchïo yn ein gwaith:
  • Rydym yn ymfalchïo'n fawr yn ein cydweithwyr, a thrwy ddull hyfforddi a mentora, rydym yn eu helpu i gyflawni eu potensial.
  • Rydym yn ymfalchïo ym mhobl Conwy, gan geisio darparu gwasanaethau a chyfleoedd sy’n gwella bywydau a lles ein pobl a’n cymunedau.
  • Rydym yn gwerthfawrogi unrhyw heriau ac adborth y tu mewn neu’r tu allan i’r sefydliad, ac yn annog hunan-asesu a myfyrio ynghylch ein gwaith fel cyfle i ddangos ein bod yn poeni ac i wella’r hyn a wnawn.
• 2. Rydym yn deg â phawb:
  • Nid arwyddair y Cyngor yn unig yw Tegwch i Bawb – ond elfen sylfaenol o’n gwaith.
  • Rydym yn croesawu ac yn parchu amrywiaeth.
  • Ac rydym yn gwrando.
• 3. Rydym yn arloesol:
  • Rydym yn arloesi er mwyn gwella’r hyn rydym yn ei wneud a sut rydym yn gwneud hynny.
  • Rydym yn rhoi cynnig ar bethau newydd ac nid oes gennym ofn i bethau fynd o chwith gan ein bod yn cefnogi ein gilydd, yn enwedig os aiff rhywbeth o’i le, gan fod cyfle i ddysgu a gwella ar sail ein profiadau bob amser.
  • Rydym yn croesawu newid, yn hytrach na’i ofni neu ei osgoi, ac nid oes gennym ofn rhoi’r gorau i wneud pethau rydym wedi bod yn eu gwneud yn draddodiadol.
• 4. Rydym yn gweithio fel tîm:
  • Rydym yn gweithio ar y cyd – nid ar wahân.
  • Mae gennym gyfrifoldebau ar y cyd yn ogystal â rhai unigol.
  • Rydym yn helpu ein gilydd i fodloni ein cyfrifoldebau statudol a rheoleiddiol, yn ogystal ag anghenion gwasanaethau.
  • Rydym yn agored i her deg gan gydweithwyr ac yn ymateb i hynny’n gadarnhaol.
  • Fel tîm, rydym yn gryfach gyda’n gilydd.